सिंधुदुर्ग today

असलदे ग्रामस्थांच्या भूमिकेचे शिवसेना आ. निलेश राणे यांच्याकडून कौतुक

अवैध दारू विक्रेत्याच्या माफीनाम्याचा  व्हिडीओ सोशल मीडियावर केला शेअर ; जागरूक ग्रामस्थ प्रत्येक गावात निर्माण झाले पाहिजेत

कणकवली : प्रतिनिधी 

 असलदे गावात दारूबंदी असताना अवैध गोवा बनावटीच्या दारू विक्रीविरोधात ग्रामस्थांनी घेतलेल्या आक्रमक भूमिकेचे कुडाळ-मालवणचे शिवसेना आ. निलेश राणे यांनी कौतुक केले आहे. ग्रामस्थांनी संबंधित दारू विक्रेत्याला जाब विचारत समज दिल्यानंतर त्या दारु विक्रेत्याने पुन्हा अवैध धंदा न करण्याची कबुली दिली. त्याबाबतचा व्हिडीओ आ. निलेश राणे यांनी आपल्या सोशल मीडिया प्लॅटफॉर्मवर शेअर करत असलदे ग्रामस्थांच्या जागरूकतेचे अभिनंदन केले.

आमदार राणे यांनी आपल्या प्रतिक्रियेत म्हटले आहे की, "कणकवली तालुक्यातील असलदे ग्रामस्थांचं जेवढं कौतुक करावं तेवढं कमी आहे. गावात दारूबंदी असताना दारू विक्रेत्याला जाब विचारत त्याला ताब्यात घेतले आणि समज दिली. असे जागरूक ग्रामस्थ प्रत्येक गावात असले पाहिजेत. असलदे गावातील ग्रामस्थांचे मनापासून कौतुक आणि अभिनंदन. तुम्ही सिंधुदुर्गाला एक नवीन सुरुवात करून दिली."

असलदे गावात अवैध दारू विक्रीच्या प्रकरणानंतर ग्रामस्थांनी एकत्र येत संबंधितांना जाब विचारला होता. या घटनेचा व्हिडीओ सोशल मीडियावर मोठ्या प्रमाणात व्हायरल झाला असून त्याची दखल आमदार निलेश राणे यांनी घेत ग्रामस्थांच्या भूमिकेचे समर्थन केले आहे.दरम्यान, आमदारांच्या या प्रतिक्रियेनंतर असलदे ग्रामस्थांच्या दारूबंदी मोहिमेला अधिक बळ मिळाले आहे. गावातील सामाजिक वातावरण बिघडविणाऱ्या अवैध दारू व्यवसायाविरोधात नागरिकांनी पुढाकार घेणे ही सकारात्मक बाब असल्याचे मत अनेकांकडून व्यक्त होत आहे.